കേരള കോണ്‍ഗ്രസ് പിജെ ജോസഫ് – പിസി തോമസ് വിഭാഗങ്ങള്‍ തമ്മില്‍ ലയിച്ചു

കേരള കോണ്‍ഗ്രസ് പിജെ ജോസഫ് – പിസി തോമസ് വിഭാഗങ്ങള്‍ തമ്മില്‍ ലയിച്ചു. കടുത്തുരുത്തിയില്‍ മോന്‍സ് ജോസഫിനായുള്ള യുഡിഎഫ് കണ്‍വെന്‍ഷനിലാണ് പാര്‍ട്ടികള്‍ ലയനപ്രഖ്യാപനം നടത്തിയത്. ചിഹ്ന പ്രശ്‌നം പരിഹരിക്കുന്നതിനാണ് തെരഞ്ഞെടുപ്പിന് തൊട്ടുമുന്‍പായി ജോസഫ് വിഭാഗം നിര്‍ണായക തീരുമാനത്തിലേക്ക് നീങ്ങിയത്.

മുന്‍ മുഖ്യമന്ത്രി ഉമ്മന്‍ചാണ്ടി ഉള്‍പ്പടെയുള്ള മുതിര്‍ന്ന നേതാക്കള്‍ ചേര്‍ന്നാണ് പി സി തോമസിനെ യുഡിഎഫ് വേദിയിലേക്ക് സ്വീകരിച്ചത്. ശേഷം ലയന പ്രഖ്യാപനം നടന്നു. പിസി തോമസ് എത്തേണ്ട ഇടത്താണ് എത്തിയിരിക്കുന്നത് എന്ന് ഉമ്മന്‍ ചാണ്ടി പറഞ്ഞു. ജനാധിപത്യ ശക്തികള്‍ ഒന്നിക്കണം എന്നും അദ്ദേഹം കൂട്ടിച്ചേര്‍ത്തു. യുഡിഎഫ് കോട്ടയില്‍ നിന്ന് പുറത്തുപോയതില്‍ ഹൃദയവേദനയുണ്ടെന്ന് പിസി തോമസ് പറഞ്ഞു. രണ്ടു പാര്‍ട്ടികളും ഈ വേദിയില്‍ വച്ച്‌ ഔദ്യോഗികമായി ഒന്നിക്കുകയാണ്. തിരിച്ചു വരാന്‍ കഴിഞ്ഞത് ഭാഗ്യമായി കരുതുന്നു. എല്ലാ കേരള കോണ്‍ഗ്രസുകളെയും ഒരുമിച്ച്‌ കൊണ്ടുവരികയാണ് ലക്ഷ്യമെന്നും പിസി തോമസ് പറഞ്ഞു.

ഐക്യജനാധിപത്യമുന്നണിയെ ശക്തിപ്പെടുത്തുന്ന സുപ്രധാന തീരുമാനമെന്ന് മോന്‍സ് ജോസഫ് പറഞ്ഞു. യുഡിഎഫിനെയും കേരള കോണ്‍ഗ്രസിനെയും വഞ്ചിച്ച ജോസ് വിഭാഗത്തിന് ശക്തമായ തിരിച്ചടി ലഭിക്കും. ഇതിന്‍്റെ തുടക്കം ആണ് ഇന്ന് കടുത്തുരുത്തിയില്‍ കണ്ടതെന്നും അദ്ദേഹം കൂട്ടിച്ചേര്‍ത്തു.

കേരള കോണ്‍ഗ്രസ് എം എന്ന മേല്‍വിലാസവും രണ്ടില ചിഹ്നവും നഷ്ടമായതോടെയാണ് പിജെ ജോസഫ് പക്ഷം ലയനതീരുമാനം എടുത്തത്. പിജെ ജോസഫ് ചെയര്‍മാനായും, പിസി തോമസ് ഡെപ്യൂട്ടി ചെയര്‍മാനായുമാണ് പാര്‍ട്ടിയുടെ പുനസംഘടന. ഇതോടെ ജോസഫ് വിഭാഗം സ്ഥാനാര്‍ഥികള്‍ക്ക് ബ്രാക്കറ്റ് ഇല്ലാത്ത കേരള കോണ്‍ഗ്രസിന്‍്റെ ലേബലില്‍ മത്സരിക്കാം. സൈക്കിള്‍ ചിഹ്നം ആവശ്യപ്പെട്ട് തെരഞ്ഞെടുപ്പ് കമ്മീഷനെ സമീപിക്കാനാണ് ജോസഫിന്‍്റെ നീക്കം.